Paasissutissat & Paasisat
Naalagaaffeqatigiinneq pillugu paasissutissat
Inuusuttut Naalagaaffeqatigiinneq pillugu qanoq isumaqarpat?
Inuusuttut Naalagaaffeqatigiinnermi inuusuttut allat peqatigalugit ataatsimoorfeqartutut misigisarpat? Kalaallit Nunaat, Savalimmiut Danmarkilu akimorlugit inuusuttut qanoq annertutigisumik imminnut ilisarisimappat? Aamma inuusuttut Naalagaaffeqatigiinnerup siunissaa pillugu qanoq eqqarsartarpat?
Sjómaq-misissueqqissaarnerup Naalagaaffeqatigiinneq akimorlugu inuusuttut imminnut ilisarisimanerat isummersuutaat misissorpai. Sjómaq-misissueqqissaarneq marlunngorlugu ataani nassaarisinnaavat – inernerit tamaasa imaqartoq tamakkiisoq kiisalu inernerit pingaarnerit imarisai.
- Misissueqqissaarnerup inerniliussai pingaarnerit
Matuma ataaniipput inerniliussat pingaarnerit sisamat, taakkua Sjómaq-misissueqqissaarnerup inernerinut tunngavigineqarput:
Soqutiginninneq annertooq, kisianni ilisimasat killeqartut
Kalaallit Nunaanni, Savalimmiuni aamma Danmarkimi inuusuttut imminnut nunaat pillugit annertuumik alapernaassuseqarput soqutiginnillutillu, kisianni oqaatsit, kulturi aamma ullumikkut inuiaqatigiinni pissutsit pillugit ilisimasatik killeqartutut misigaat.
Naligiinnerulernissamik oqaloqatigiinnerunissamillu kissaateqarneq
Inuusuttut akornanni amerlasuut Naalagaaffeqatigiinneq akimorlugu naligiinnerusumik attaveqatigiinnissaq aammalu isummat siumut aalajangiunneqarsimasut oqaluttuarisaanermilu stereotyperit pinngikkaluarlugit oqaloqatigiinnerup nukittorsarneqarnissaa kissaatigaat.
Inuttut naapinnerit aqqutigalugit ataatsimoorneq
Inuttut naapinnerit, paarlaasseqatigiinnerit aamma suliniutit ataatsimoorussat akornusersuutit piiarnissaannut, ikinngutigiinnerit sivisuumik atuuttussat pilersinnissaannut aammalu ilumut paaseqatigiinnermik pilersitsinissamut sakkussat sunniuteqarnerpaatut isigineqarput.
Assigiinngilagut, kisianni amerlasuunik ataatsimoorfeqarpugut
Naak oqaluttuarisaanikkut kulturikkullu tunuliaqutit assigiinngikkaluartut, nunani pingasuni inuusuttut ullumikkut inuusuttut inuuneranni takorluukkat, unammillernartut, soqutigisat naleqartitallu amerlasuut ataatsimoorussaraat.
Misissueqqissaarneq pillugu
- Epinion suleqatigalugu, DUF-ip aammalu Kalaallit Nunaanni Savalimmiunilu DUF-ip suleqatigisai misissueqqissaarneq suliaraat. Misissueqqissaarneq makkuninnga sammisaqarpoq: i) ilisimasat, ii) soqutiginninneq, iii) paasinninneq kiisalu iv) ataatsimoornermik misigisaq, isummat aamma Naalagaaffeqatigiinnerup siunissaa.
- Misissueqqissaarneq immikkoortunik marlunnik imaqarpoq: nunani pingasuni tamani inuusuttut akornanni kisitsisit tunngavigalugit apeqqutinik akissuteqarnermik misissuineq kiisalu eqimattakkaarluni oqaloqatiginninneq tunngavigalugu pitsaassutsimik misissuineq, taanna aamma nunani pingasuni tamani inuusuttunik peqataaffigineqarpoq.